Friday, March 26, 2010

[轉載] 我的愛情故事 - 我遇見了她 《十六》

【轉載自香港討論區 - 我 的愛情故事 - 我遇見了她 (親身經歷)(完)

[轉載] 我的愛情故事 - 我遇見了她 《十五》

第二朝~我好早起身返工,成晚都無訓過。到九點正式開工後,整個人都好做唔到野。心神彷彿!上司每次叫我!都要兩次或以上,我先有反應比返佢。真係唔似我平時。整個人都唔投入。所以,我覺得時間過得特別慢。我好辛苦先捱到十一點半,但係D文件打都未打過,只係聽到D電話不停追來:D野有未呀?等左好耐啦! 我仍然好漫不經心。只係抱住依一種既態度:<你咪等下囉!>做做下野,突然間收到Christine 既SMS:

<鳴鳴~我比客係電話鬧呀!你有冇比D客鬧你呀!:( >

我望一望完,嬲霸霸將個電話放返入個櫃桶。個心係度諗:<SEND來仲乜啦?好熟呀?>但係唔夠五分鐘到啦。我既態度有少少轉變左,個心時不時心掛掛,想打開個櫃桶,但係又襟住左喎。但係總比左好多好似理由比自己咁:<或者佢可能好想有人關心啦?咪當吓關心朋友。>好似想個盡辦法說服自己要SEND 個SMS比人。最後,點能抵擋度啦。終於我忍唔住就係個櫃桶到攞返個電話SEND返比佢。但係SEND比之前,我去問左我後面位同事一個問題。

我:<喂~有D野想問你呀?咩野叫爛GAG 呀?>
同事:<爛GAG意思,大慨既意思我都好難具體講。我既理解係懶好笑咁囉。>
我:<唔明?>

於是佢講左幾個例子比我聽,我終於明白啦。於是就SEND左比佢啦:

<唔好唔開心啦…你咪當佢搞佢爛GAG囉。無鬼理佢、當佢吹牛。^^>

過左一陣,我又收返佢既回訊:

<吹牛係你既專利來架!我平時只係吹開水渣。我唔講住啦。我要做野!Anyway~多謝你關心。我好好啦^^>

哈~佢竟然記得我既爛GAG。我睇完只係覺得好好笑。又未到一種好開心好甜既感覺。始終,阿威既說話對我有一定既影響力!內心對Christine 多左一道防線。但係佢既SMS的確比到改變我既!我成朝都無同任何人講過野。只係唔出聲係個位度。咩野人都想唔理。但係Christine一個既SMS。令到我將注視自己既感受轉移到佢身上。同埋因為佢既緣故,我就主動聊D同事傾下話。唉~感情真係好複雜!竟然對住同一個人。可以有兩種反應。有時我發覺堂堂一個男人,有時當鍾意起一個人既時候!內心世界同女人都係一樣無乜分別。個口話唔想見唔會做架?但係個心呢?只要佢肯主動少少,你就會可以推返晒自己所講既野。或者~只係我個人容易心軟啫。未必係男人係咁既。

好辛苦終於等到放工,依個時候~我諗起一個人,唔係Christine、唔係阿威、阿文。係一個令我可以暢所欲言既紅顏知己。佢叫阿靜。

阿靜:<阿Wind~點呀?>
我:<阿靜~好耐無見啦?最近點呀?>
阿靜:<無乜太大特別啦?你呢?把聲好死喎。>
我:<係呀~我有煩惱呀!>
阿靜:<你唔係同我講有對象呀?>
我:<哈(苦笑)~我今日真係無搵錯人去。>
阿靜:<咁就要洗耳恭聽!>

我覺得真係要買部錄音機先。我發覺當我講到有對象時。D朋友總係要我由頭到尾講一次。不過,講起Christine相遇既事。真係唔介意講好多次。因為,越講、我都會越回味。

阿靜:<嘩~好特別呀!咁既事都會有既。>
我:<就係因為特別,我先咁難忘。>
阿靜:<阿Wind呀!你介唔介意聽我既諗法呀?>
我:<當然唔介意啦。我打來都係想聽下你點講?>
阿靜:<我覺得感情唔好可以太過計較得失;結果。鍾意一個人點可以咁猜疑別人架?>
我:<但係…>
阿靜:<但係咩野呀!萬一發生左阿威咁講,你會點?你會好傷嘛!感情係要博架、係要好任性去做呀!無任何計算、只係想做就去做,
就算真係發生左,唔需要向別人交代。因為只有你自己先可以擔承一切結果,可能好痛?但係你係有開心過嘛。>
我:<阿靜呀!同你講完,我知道自己應該點知。我清晰晒啦。仲舒服左好多添。>
阿靜:<阿Wind呀!講多一句啦~感情係你就係你。真係來時,你擋都擋唔住呀!女人只係相信自己既感覺!如果佢真係對你有感覺。佢一
定唔會計較你既一切。唔好自卑!一切順其自然啦。>

同阿靜講完,真係舒服左好多。我內心既情緒一下子釋放晒出來。從佢既對話,佢好明白我、了解我既狀況!仲可以將一D我自己潛在既問題,都可以發掘出來,而且加以鼓勵!真係得到佢好大既鼓舞!朋友真係好重要。同佢講完之後,我立即SEND左個SMS比我兩個兄弟,雖然阿靜話唔需要理人點睇,但係我真係好在意佢地既諗法,好想佢地都可以support 我。

<兄弟…無論發生咩野事都好,我知道你地會係我身邊支持我。陪我走!讓我既跟隨我既感覺走一次。或者咁我可能更舒服!>

我知阿文會支持我,反而,我就好擔心阿威佢點睇!因為我地相識咁耐好少持相反意見。我收到佢既回應,真係令我好感動。

<大佬想掂就掂,做兄弟一定會全力支持你既!>

我感到好意外,連阿威都講D咁既野,依一刻既我真係放下晒心頭大石。全心全意去投入對Christine既感覺。
過左大約個半鐘度啦~Christine打左個電話比我。問我星期六有冇街去。佢打得來真係合時,正當我心大心細,仲係度諗緊點處依件事時。一切問題已經解開晒。仲要問既?我點會推呀。^^

[轉載] 我的愛情故事 - 我遇見了她 《十七》

No comments:

Post a Comment