Friday, March 26, 2010

[轉載] 我的愛情故事 - 我遇見了她 《一》

【轉載自香港討論區 - 我的愛情故事 - 我遇見了她 (親身經歷)(完)

我係一個新手,好想分享自己既愛情故事。可以識到更多既朋友。
希望大家會支持…

我係一個性格樂觀、主動。喜歡浪漫、不切實際!
對愛情好簡單既人,只係合眼緣有FEEL,就得。
但係緣份好多時都係未到就未,話唔來就唔來。
就算你幾想擁有,緣份總是戲弄人、就戲弄人。
每當自己搵到一個鍾意人時,可惜,
你往往都唔能如願意償。總係被拒絶收場。
相反,你唔想鍾意既人就會痴埋來。
我真係好心灰意冷,打算放棄,把自己既愛情寄託予四方。
還要講句:人生也不只戀愛這一路。
滿有決心之際,但係我又放棄依一個念頭。
因為......

電話響~

我:<喂…點樣!>
阿文:<今晚出來啦,有d好野比你睇!>
我:<吓……>
阿文:<吓咩野啦…睇你都無人約啦!>
我:<無人約…大把女約我呀!>
阿文:<你有咩野女呀!有女我會唔知!唔理你呀!今晚一定要出。>
我:<是但啦…咁你搵埋阿威出來喎?>
阿文:<阿威唔得閒呀!>
我:<咁算啦…照出啦!>
阿文同阿威係我識左十幾年既兄弟,對我感情生活十分了解!
今晚既約會來得突然!有D古怪…
我約左好朗豪坊一間食泰國野既餐廳!我一入到去,阿文已經搵定位,
竟然身邊多左個女仔?

阿文:<喂…依度呀!>
我:
阿文:<介紹你識…依個我女朋友Maggie>

我地就咁見左兩個鐘頭,一路食飯、一路吹水。氣氛都好開心。
當道別後,我內心好矛盾~一方面好開心係阿文拍拖、另一方面
唔開心,我仍然係單身,連自己鍾意既人、動心既人都搵唔到。
我整個人係一個悶悶不樂既心情下去搭小巴返觀塘。

當車去到牛頭角時,突然間落好大雨,我好好彩有帶雨傘。
我落車以後,想起要襟錢…就去左渣打銀行,正當我入門口既時候。
見到一個好靚、好清純既女仔。係度望住個天。於是,我昅左佢一眼。
其實唔止一眼,係好多眼…然後襟錢…但時不時都望一望個女仔。
我係度諗?好唔好問下佢要唔要"姐"佢呢?
但係我亦好怕,因為素未謀面,又唔識你,洗乜你咁好心。
內心真係極其爭扎。結果,我深吸一下…同自己既講:算吧啦…
然後收埋D錢後,就行出去同一個門口,但係雨勢好大,無停過。
我打開左雨傘,忍唔住鼓起左最大既勇氣同佢講。

我:<不如我"姐"埋你啦?>
她:<吓…我諗唔洗啦!>(佢望一望天)
我:<我睇來場雨都會有排落,你咁等唔係辦法,
          我"姐"你過OK買把雨傘啦。>
她:<咁好啦…唔該你呀>

我從來無諗過自己咁大膽呀?竟然咁有勇氣同佢講,係出自一份好心呢?自己心裡有數?沿途我都唔敢同個女仔傾計,只係低頭咁慢慢行到OK。我好耐都未試過同個女仔雨中漫步啦。行到OK門口。

她:<唔該晒你…>
我:<唔洗…我走先啦…BYE!>

就咁…我同佢就道別左,依一個女仔,係我第一個一見鍾情既人。
唔知再有冇機會見到佢呢?

[轉載] 我的愛情故事 - 我遇見了她 《二》

No comments:

Post a Comment